Monthly Archives: May 2021

TAARIFA KWA VYOMBO VYA HABARI

Rais wa Jamhuri ya Muungano wa Tanzania, Mhe. Samia Suluhu Hassan leo tarehe 31 Mei, 2021 amekutana na kufanya mazungumzo na Mkurugenzi wa Miradi wa Taasisi ya The Susan Thompson Buffet Foundation Bi. Senait Fisseha ambayo inajihusisha na masuala ya afya ya wanawake.

Bi. Senait Fisseha amemueleza Mhe. Rais Samia kuwa taasisi hiyo ambayo imekuwepo hapa nchini kwa zaidi ya miaka 10 imetumia dola za Marekani takribani Milioni 90 (sawa na shilingi Bilioni 206) kufadhili miradi ya inayoshughulikia changamoto mbalimbali zinazohusiana na afya ya uzazi kwa wanawake na wasichana.

Amebainisha kuwa miradi hiyo imesaidia kukabiliana na vifo vinavyohusiana na ujauzito kwa kuwawezesha wanawake kupanga wakati gani wa kupata ujauzito, wakati gani wa kujifungua, kuepuka ujauzito katika umri mdogo na kujifungua salama.

Bi. Senait Fisseha ameshukuru kupata nafasi ya kuzungumza na Mhe. Rais Samia na amebainisha kuwa baada ya mazungumzo hayo taasisi hiyo ipo tayari kuendeleza miradi hiyo kwa kushirikiana na Serikali kupitia Wizara ya Afya, Maendeleo ya Jamii, Jinsia, Wazee na Watoto. 

Kwa upande wake, Mhe. Rais Samia ameishukuru Taasisi hiyo kwa mchango wake katika masuala ya afya ya wanawake hapa nchini na amemhakikishia kuwa Serikali ya Tanzania ipo tayari kushirikiana nayo ili kukabiliana na changamoto zinawakabili wanawake na wasichana katika masuala ya afya.

Mazungumzo hayo yamehudhuriwa na Waziri wa Afya, Maendeleo ya Jamii, Jinsia, Wazee na Watoto Mhe. Dkt. Dorothy Gwajima na Mganga Mkuu wa Serikali Dkt. Aifello Sichwale ambao baadaye wamefanya mazungumzo na Bi. Senait Fisseha kwa lengo la kujipanga namna taasisi hiyo itakavyofanya kazi na Serikali.

Rais Mhe. Samia Suluhu Hassan akutana na kufanya mazungumzo na Profesa Sinait Feisseno Mkurugenzi wa Miradi wa Taasisi ya Suzan Thompson Buffet Ikulu Jijini Dar es Salaam

Rais wa Jamhuri ya Muungano wa Tanzania, Mhe. Samia Suluhu Hassan akiwa katika mazungumzo na Mkurugenzi wa Miradi kutokaTaasisi ya Suzan Thompson Buffet (The Suzan Thomson Buffet Foundation) Profesa Sinait Feisseno mara baada ya kuwasili Ikulu Jijini Dar es Salaam leo tarehe 31 Mei, 2021.
Rais wa Jamhuri ya Muungano wa Tanzania, Mhe. Samia Suluhu Hassan akiwa katika picha ya kumbukumbu na Mkurugenzi wa Miradikutoka Taasisi ya Suzan Thompson Buffet (The Suzan Thomson Buffet Foundation) Profesa Sinait Feisseno pamoja na Waziri wa Afya, Maendeleo ya Jamii, Jinsia, Wazee na Watoto Dkt. Dorothy Gwajima mara baada ya mazungumzo yao Ikulu Jijini Dar es Salaam.
Rais wa Jamhuri ya Muungano wa Tanzania, Mhe. Samia Suluhu Hassan akiagana na mgeni wake Mkurugenzi wa Miradi wa Taasisi ya Suzan Thompson Buffet (The Suzan Thomson Buffet Foundation) Profesa Sinait Feisseno mara baada ya mazungumzo yao Ikulu Jijini Dar es Salaam